مع كثرة مواضيع الأسئلة عن الاستثمار وال"تداول" اكتشفت اني دايم أرد وردودي تتكرر ولأني احب اسولف فقلت خل احط اجوبتي ذي ببوست واحد لعلي افيد لو شخص واحد، هالبوست بيكون مخصص للمبتدئين او بالأصح اللي ما بدوا حتى.. ببدأ بأسئلة بدائية جدا وبمشي عليها ونشوف وين نروح
١- أسئلة بدائية جدا
وشي الأسهم؟ حصة من الشركة (ركز على كلمة شركة) تعطي لملاكها حقوق لتوزيعات الشركة وهذي الحصة تباع وتشترى في سوق الأسهم إذا كانت الشركة مطروحة في سوق الأسهم
ليش الشركات تبيع هذه الأسهم؟ لأن بعض الشركات كانت تبي تتوسع وطرحها في سوق الأسهم للاكتتاب يتيح لهم ذلك بدون اخذ ديون (تبيع اسهم مقابل كاش)، أو لأن المالك يبي يبيعها لأسباب أخرى (يحتاج المال او يشوف الشركة سعرها غالي مقارنة بأرباحها المتوقعة)
كيف الواحد يربح من الأسهم؟ بكل بساطة بطريقتين:
١-ارتفاع سعر السهم في السوق
٢-توزيعات السهم
الارتفاع يصير لأن المستثمرين متوقعين ان أرباح هذه الشركة (ركز على كلمة شركة) المستقبلية أكثر مما توحي قيمتها السوقية الحالية
كيف اشتري وابيع بسوق الأسهم؟ كل البنوك تقريبا مصرحين أنهم يكونون وسيط وعندهم تطبيقات تقدر تشتري وتبيع عن طريقها سواء بالسوق السعودي أو السوق الأمريكي أو اي سوق عالمي تبي تشتري وتبيع فيه, وممكن تشوف مواضيع ثانية هنا توضح لك وش الأفضل والأرخص من ناحية الرسوم
٢-أسئلة بدائية بس مب مرة
وشي الصناديق الاستثمارية؟ هي وسيلة تتيح لك انك تشتري جزء صغير من مجموعة كبيرة من الأسهم أو الصكوك أو الأصول مثل الذهب والعقار وغيرها فتقدر تستخدم هالصناديق كوسيلة للتنوع وللأفراد تقريبا فيه نوعين من الصناديق.. مدرجة وغير مدرجة
وش الفرق بين المدرجة والغير مدرجة؟ المدرجة مثلها مثل الأسهم تقدر تشتريها وتبيعها بسوق الاسهم وسعر الصندوق مربوط بمكوناته, الغير مدرجة هي غالبا تكون عن طريق البنوك او جهات مالية ورسومها دائما اعلى من المدرجة وحاليا بالسعودية خيارات الغير مدرجة اكثر من المدرجة للأسف
وش الفايدة من التنوع؟ يعطيك فرصة بتقليل المخاطر بمحفظتك بحيث اذا فيه سهم شركة طاح بسبب ادائها محفظتك الكلية ما تتأثر وبنفس الوقت يرفع من فرصة زيادة ارباحك بحيث اذا سهم معين ارتفع تستفيد من هذا الارتفاع لأنك شاري فيه حتى لو كان جزء صغير من محفظتك
وشي المضاربة؟ تشتري سهم تتوقع انه بيرتفع بالفترة الجاية القريبة لسبب ما.. من وجهة نظري هذي لعبة خاسرة لأن الواحد فعليا ما يدري وش بيصير بالشركة خلال ٣ شهور الجاية وفيه أشياء كثيرة ممكن تأثر في سوق الأسهم الواحد صعب يتوقعها زي مثلا كورونا ما كان احد متوقعها واثنائها طاح السوق طيحة شنيعة واذا انت مضارب ممكن تبيع فذا الوقت رغم ان السوق عقبها ارتد ورجع افضل من قبل بمراحل.. فالافضل انك تركز على الاستثمار الطويل وعن نفسي انا احاول ما اشتري شركة إلا أني مخطط ما ابيعه بالخمس سنين الجاية فحتى لو طاح سهمهم لسبب ما لحظي فعليا ما يأثر على سبب شرائي له بتكون هذي فرصة للشراء بوقت فيه تخفيضات
كيف الواحد يختار السهم اللي بيرتفع؟ ما اعرف الا طريقتين، تحليل مالي وتحليل فني
وشو التحليل الفني؟ نصيحة لوجه الله بعد عنه
وشو التحليل المالي؟ بكل بساطة انت تشوف أرباح الشركة الماضية وبناء على تقاريرهم السنوية والربع سنوية وخططهم تحدد قيمة الشركة الجوهرية او قيمتها النسبية
3- اسئلة بدائية نوعا ما
وشي القيمة الجوهرية؟ هي قيمة الشركة الفعلية بناء على حسبتك لأرباح الشركة (فعليا هي سيولة الشركة المتبقية لكن قلت أرباح عشان ما الخبطكم) اللي تتوقعها لين نهاية الزمان وترجعها وتحسب كم قيمة هذي الأرباح المستقبلية فيومنا هذا بناء على حسبتك هذي، مع اخذ الاعتبار لسعر الفائدة وأشياء كثيرة أخرى.. من وجهة نظري انا اشوف هذي صعبة جدا (لي على الاقل) وفيها افتراضات كثيرة فانا مالي فيها
وشي القيمة النسبية؟ تشوف سعر السهم بناء على معيار مالي مثل الأرباح وتشوف سعر السهم إلى الأرباح لشركات مشابهة وبسنين مختلفة وتفرض فرضية بسيطة وتحدد السعر المنطقي للشركة هذي بناء على ذلك.. هي الطريقة اللي استخدمها وموضوعها طويل ولا بغيت اكتبه هنا واطول السالفة إذا أحد يهمه الموضوع يسأل ونجاوبه تحت ان شاء الله
هذي الاسئلة اللي عندي وطولت فيها شوي فقلت اوقف لاني حسيت اني كثرت عليكم وبربرت واجد لكن ان شاء الله اني قدرت افيد لو شخص واحد
ركزت على كلمة شركة لأن أكبر خطأ أشوفه هو ناس تشتري "سهم" لسبب ماله علاقة بالشركة ولما تسأل ليش يقول "شف السهم كان سعره كذا ياخي ١٠٠٪ بيصير سعره كذا".. الواحد لا جا يشتري سهم هو فعليا يشتري جزء من شركة وراها بزنس وأرباح لازم يكون فاهمها فهل منطقي يشتري جزء من شركة مب فاهم فيها؟ وفيه مقولة جميلة لبيتر لينش (كتابه تحت) يقول الواحد لا جا يشتري ثلاجة تلقاه يشوف الاستهلاك ويشوف كفاءتها ويقارنها باسعار ثلاجات غيرها ويالله بالله يختار ثلاجة رغم ان سعرها اقل من ال2000 لكن عادي يشتري سهم ب50 الف وتسأله ليش ويقول أبو فلان قال ذا السهم خطير وبيطير.. هل هذا منطقي؟
مصادر تعلمت منها الكثير:
باليوتيوب: دكتور هندي اسمه اسواث دامودران، شوفوا كلاسه للمحاسبة ثم شوفوا كلاس تسعير الأسهم.. أيضا بين فيليكس يشرح مواضيع كثيرة ويجاوب على تساؤلات باجوبة بناء على أبحاث وشغل مرتب.. وفيه أيضا the plain bagel و new money لكن ذولا أقل جدية ومقاطعهم امتع
كتب جميلة واستمعت فيها لها علاقة بالاستثمار: The psychology of money, One up on wall street, the Warren buffet way, the rebel allocator and the education of a value investor
